المقاله دي مكونه من 4 أجزاء فيهم 4 حلول هينفعوك إن شاء الله علشان تلاقى موبايلك
و طريقة تطلع بيها شريحة بنفس الرقم اللى اتسرق 😀
خطوه مهمه قبل فقدان الهاتف
بتكون لتعقب الموبايل و التحكم فيه عن بعد:
و فى الخطوة دي احتمالات رجوع الموبايل أو معرفة احنا نسيناه فين بتكون أكبر بعون الله
1- هنحمل البرنامج المجاني دا من Play Store
https://play.google.com/store/apps/details?id=tk.hasankassem.lostofflinefree
و نسطبه على الموبايل
2- هيطلب منك انك تعمل كود سري مميز
لازم دايما تكون فاكر الكود ده، أو تكون كاتبه فى ورقة و حاططها فى محفظتك أو مسيفها على موبايل تانى معاك أو تديها لحد من قرايبك أو أصدقائك (يعنى عينه في أي حتة بعيد عن الموبايل اللى هيتسرق إن شاء الله بدون مقاطعة 😀 )
3- كمان لازم تسيب الـGPS مفتوح على وضع High Accuracy
و بكدة الموبايل بقى جاهز ان شاء الله
4- إنك تقفل الموبايل بحيث ميشتغلش غير على شريحتك بس (العملية بأكملها متوقفة على السرعة و الخطوة دي)..
Settings / Security / SIM Card lock
Settings / Security / Encrypt your phone
خلى بالك إن لازم يكون معاك الـPin code بتاع الشريحة علشان متتسوحش؛ لأنه كل مرة هتفتح فيها الموبايل هيطلب منك الكود 😀
5- لو لاقدر الله الموبايل اتسرق:
- هتبعت رسالة SMS من أي موبايل تانى لموبايلك اللى ضاع منك
- الموبايل اللى ضاع بيفتح تلقائيا تطبيق خرائط جوجل (Google maps يعنى 😀 ) و يبعتلك رسالة SMS فيها إحداثيات المكان اللى هو فيه بالظبط (بيبعتها طبعا للموبايل اللى انت أرسلت منه الرسالة)
- بتفتح خرائط جوجل و تدخل الإحداثيات اللى الموبايل بعتها و بيحيبلك المكان بالظبط
الطريقه الاولي :-
شروط الطريقة دى:
1- السرعة: بحيث انك تبعت رسالة الكود بمجرد ما تكتشف ان الموبايل مش فى جيبك.. مش لما تبقى تروح و تبقى تشوف هتعمل إيه، و تكلم عمو فلان اللكاك و تقوله إن الموبايل اتسرق و كدة 😀 على ما تبدأ تدور هيكون الموبايل سافر ليبيا 😀
2- قفل الموبايل على الشريحة: و دا علشان حتى لو اللى لقاه أو سرقه حاول يغير الشريحة أو يشيلها الموبايل يطلب منه أكواد انت اللى بتحددها
Settings / Security / SIM Card lock
Settings / Security / Encrypt your phone
خلى بالك إن لازم يكون معاك الـPin code بتاع الشريحة علشان متتسوحش؛ لأنه كل مرة هتفتح فيها الموبايل هيطلب منك الكود 😀
3- سرعة الوصول للمكان اللى الموبايل بعت إحداثياته لأن مفيش حرامي بيستقر فى مكان كتير
4- عدم محاولة الاتصال بالموبايل إلا لما تقرب من المكان اللى اتبعت من الموبايل و دا برضو لتفادى ان اللى سرقه يرمى الشريحة أو يرمى الموبايل تحت أي عربية 😀
5- يفضل جدا انك تقفل الموبايل عن طريق Pattern أو Password أو Pin Code علشان تلهى الحرامى أكبر فترة من الوقت على ما يفتحه
**ملحوظة**
- التطبيق دا موجود منه نسخة مدفوعة بتديك إمكانيات أكبر زي إن الموبايل يفضل يرن و ما يقفش غير لما تدخل كود سري
- أو إنك تقفل الموبايل
- أو إنك تمسح كل البيانات اللى عليه
- إحنا مش هننزل النسخة دى بطريقة غير شرعية حفاظا على المجهود الجبار اللى عمله المطور، و دعما للمحتوى العربي
الطريقة التانية :-
طريقة أطول شوية بس برضو فى احتمال كبير ان الموبايل يرجع ان شاء الله:
1- هتعمل بلاغ فى قسم شرطة بواقعة السرقة مع ذكر موديل الهاتف و الرقم المسلسل للموبايل IMEI في البلاغ.
_**رقم IMEI دا (اللى الناس بتقول عليه ظلما و بهتانا "السيريال نمبر") بنجيبه من على العلبة أو دخل الكود دا فى الموبايل
#06#*
2- هتطلب قرار من النيابة العامة بتتبع الهاتف المذكور في بلاغ الشرطة. "القرار بيتحول للمرفق القومي لتنظيم الإتصالات".
3- قرار التتبع بيحتاج موافقة المرفق القومي لتنظيم الاتصالات NTRA (إسمه كدة 😀 ) و له فرعين:
- شارع المخيم الدائم فى مدينة نصر
- و القرية الذكية
4- المرفق بيديك ورقة التتبع من 3 نسخ.
5- هتروح للمراكز الرئيسية للـ3 شركات مقدمة الخدمة في مصر (و اللى كلهم طبعا أوسخ من بعض 😀 ) و تسلم خطابات التتبع الصادرة للموبايل دا "بنفسك".
**ملحوظة**
ممكن تحتاج معارف و ناس واصلة لتسريع الإجراءات.. مش ممكن، هو أكيد إن شاء الله 😀
6- غالبا اللى سرق الموبايل ببيعه في أقرب فرصة أو بيركب عليه شريحة تانية ... و فى كل الأحوال المشتري الجديد أو الحرامي بيشغل شريحته علي الموبايل ....
7- و هنا الشركة مزودة الخدمة "أيا كانت" بتبلغ الشرطة بإسم المستخدم الجديد للموبايل ...
8- الشرطة بتبعت جواب لعنوان البرنس اللى اشترى الموبايل، و بيقولوله إما إنك تسلم الموبايل أو هنقلب المحضر لقضية و نجرجرك في المحاكم 😀
9- و هنا بيضطر المشتري الجديد إلي إنه يسلم الموبايل منعا لإن الموقف يتطور قضائيا
10- المفروض ان الشرطة بتراسلك أو بتكلمك علشان يبلغوك ان الموبايل عندهم و انت بتروح تاخده بقى و تتصور سيلفى مع الأمنا و تنزل الصورة فى جروب تجربة 😀
الطريقة التالتة :-
و دى هتستخدم فيها خدمة جوجل بتقدمها من زمان علشان تلاقى الموبايلات المسروقة
- على موبايلك الأندرويد ادخل على:
Settings / Security / Device administrators
- هتلاقى حاجة إسمها Android device manager
- اختارها و اختار منها Activate
ادخل على الجزء بتاع الـAccounts على الموبايل
اختار Google
هتلاقى خيار Location اختاره
اسمح لجوجل إنه يوصل لمكانك عن طريق تفعيل خيار Access my location
خلى الـLocation Mode على وضعية High accuracy
-
لو الموبايل ضاع منك ادخل على اللينك دا:
http://www.android.com/devicemanager
و سجل دخولك بأكاونت جوجل اللى انت شغال بيه على الموبايل
هتلاقى خيارات كتير منها إنه يحدد مكان موبايلك على الخريطة (Locate)
أو يشغل جرس الموبايل لمدة 5 دقايق (Ring)
أو يمسح كل اللى على الموبايل (Erase)
أو يقفل الموبايل (Lock)
الطريقة الرابعة :-
و دى علشان لو معملتش الخطوات اللى فوق دي؛ و دى بتبوظ الموبايل حرفيا و بتخليه مجرد حتة حديدة (أو بلاستيكاية لو سامسونج 😀 )
و الاستفادة الوحيدة بتكون إنك بتدى للى سرق الموبايل خازوق لذيذ و تخليه ميعرفش يستفيد من الموبايل ولا يبيعه؛ و دا لأن الـIMEI بتاع الموبايل بيتمنع من استخدام أي شبكة اتصالات فى مصر، حتى لو انت لقيته بعدها و رحت مقر الشركة بنفسك 😀
من دلوقتي دخل الكود دا فى الموبايل #06#*
هيظهر السيريال نمبر بتاع جهازك
احفظه بعيد عن الموبايل فى ورقة فى محفظتك أو مع حد تثق فيه أو مع حد من أهلك !!
مجرد الموبايل يتسرق كلم شركة الاتصالات واديهم الرقم وشركة الاتصالات بتعمل اغلاق Block كامل للجهاز
وحتى اللى سرقه لو حط فيه شريحة تانية مش هيشتغل خلاص وبكدا تكون فشيت غلك فى الحيوان اللى سرق الموبايل و بوظت موبايلك بنفسك 😀
نيجى بقى لحتة الشريحة و ازاى تطلعها بنفس الرقم لو معرفتش تجيب الموبايل لا قدر الله
- هتروح لأي فرع من فروع الخدمة اللى تبع الشبكة بتاعتك و معاك علبة الخط أو رمز الـPUK اللى مكتوب على الكارت اللى فيه الشريحة
- لو مش موجودة (كالعادة طبعا) هتروح بصورة البطافة اللى متسجل بيها الخط (أو البطاقة نفسها و هما بيصوروها عادى 😀 ) و بيطلعولك الشريحة.
- لو شارى الخط من حد و كان متسجل ببطاقة تانية هيدولك ورقة و يقولولك اكتب رقم الموبايل و أكتر 5 أو 7 أرقام كلمتهم آخر أسبوعين، لذلك لازم تكون حافظ الأرقام دى أو مسيفها على موبايل تانى أو نوتة تحسبا للظروف دى
- لو تعرف موظف فى فرع الخدمة هيجيبلك الشريحة الجديدة من غير ما تعمل كل دا، بل دتى من غير ما تروح فرع الخدمة 😀
—————
و فى النهاية ربنا يسترها معانا جميعا و محدش يتحط فى الموقف دا .
ليست هناك تعليقات:
إرسال تعليق